تازه پرلیکه شوي
Home / سلایډر / نن مې هغه زړه راټول که چې د دوی له لاسه خور وو

نن مې هغه زړه راټول که چې د دوی له لاسه خور وو

 

هغه ټول بوتان مې مات کړل

هغه ټول یاران مې پریښول

چې له مانه به چاپير وو

زه یې ځان لره لیدلمه

او زه یې ځان لره ساتلمه

چې زه ښاد ومه دوی ښاد وو

اوس زه نه یمه دوی اباد دي

هغه ټول بوتان مې مات کړل

هغه ټول یاران مې پریښول

هغه ټول کورونه وران شول

چې له سرو زرو نه جوړ وو

چې روحونه پکې قید وو

وجودونه پکې قید وو

د جونګړو رڼاګانې

پکې تتې او تتې پاتې

نن مې هغه ګودر وران کړ

چې د ماتو منګو نښې یې

زما په زړه پرتې وې

اوس یې هر بوټی بیمار دی

د پیغلوکو پلو ته

بنګړي والو شین خالو ته

نن مې هغه چنار وسوو

چې په ډډ یې تر ازله

دوه نومونه وو لیکلي

خو له یو بله جدا وو

په لفظونو کې بیلوالی

وجودونو کې بیلوالی

هغه ټول خوبونه لاړل

چې تعبیر یې سهر نه وو

له روزګاره یې ویستلم

د رڼا یې خبر نه وم

هغه ټول دردونه خپل شو

زه لا هاغسې یوازې

زه لا هاغسې روان یم

هغه ټول بوتان مې مات کړل

زه یې ستړی په سجدو کړم

ډیر ستړی په نارو کړم

خو دوی نه ګویانه کیږي

دوی په چا نه خوشحالیږي

دوی په چا نه خفه کیږي

زه لا هغسې دوی ستایمه

نو تر کومه به زه پایمه

نن مې هغه ژبه پرې کړه

چې د دوی ثنا پولۍ کړه

نن مې هغه تندی مات کړ

چې د دوی په پښو کې پروت وو

نن مې هغه ویستې

چې په یو ښایست پسې وې

نن مې هغه مینه پرېښوه

چې په زرو او شودو وه

نن مې هغه زړه راټول کړ

چې د دوی له لاسه خور وو

نن مې هغه سړی مړ کړ

چې یو بت و بې پښتو

یوې مینې ته کوز سترګی

خپلې ژبې  ته بې پته

خوږې مور ته ملامته

خپلې خور ته ملامته

خپلې خاورې ته مجرم و

خپل ولس ته ملامته

ما په ټول عمر کې خدایه

دغه لویه توره وکړه

چې د هغه بوت په وینو

سپینه توره مې نن سره کړه

چا چې ټول عمر وژلم

نن په یو ګوزار مې مړ کړ

هغه ټول بوتان مې مات کړل

هغه ټول یاران مې پریښول


اسرار اتل

خپل نظر ولیکئ

Your email address will not be published. Required fields are marked *

*

Free WordPress Themes - Download High-quality Templates